چیئرمین پاکستان فاریکس ایکسچینج ایسوسی ایشن ملک بوستان نے ملک میں ڈالر مزید سستا ہونے کی نوید سناتے ہوئے کہا ہے کہ پاکستان کے دیوالیہ ہونے کا دور دور تک نشان نہیں ہے، منفی پروپیگنڈا کرنے والے خدا کا خوف کریں۔
میڈیا سے گفتگو کرتے ہوئے ملک بوستان نے کہا کہ ہمارے پاس سپلائی 5 سے 7 ملین ڈالرز ہے، مارکیٹ میں اتنا والیم نہیں تھا، جب ڈالر کی طلب آئی تو نرخ بڑھنے ہی تھے۔ڈالر 315 سے 320 روپے کے درمیان چلا گیا تھا۔
عازمینِ حج کے لیے بھی ڈالر کی ڈیمانڈ ہے تاہم عید پر اوور سیز پاکستانی آئیں گے اور بیرون ممالک سے کرنسی آنے کی وجہ سے ڈالر کا ریٹ گرے گا۔
ملک بوستان کا کہنا تھا کہ ہماری قوم کسی حال میں خوش نہیں ہوتی، حکومت ڈالر کے ریٹ بڑھاتی ہے تو کہتے ہیں کیوں بڑھا رہے ہیں؟ حکومت ڈالر کے ریٹ نہیں بڑھاتی تو کہتے ہیں نرخ بڑھا کیوں نہیں رہے؟۔
ملک میں 10 ارب ڈالرز زرِ مبادلہ موجود ہے، 28 ماہ میں پہلی بار کرنٹ اکاؤنٹ سر پلس ہوا ہے،اسحاق ڈار کو آگاہ کردیا ہے کہ بینک کریڈٹ کارڈ ہولڈرز کے لیے ڈالر خرید رہے ہیں۔
آئی ایم ایف نے حکومت کو تگنی کا ناچ نچایا ہوا ہے، آئی ایم ایف روز نیا مطالبہ کرتا ہے، ان کی وجہ سے تھوڑا مشکل وقت آیا ہوا ہے، 6 ماہ سے ڈیڈ لاک ہے تاہم امید ہے کہ آئی ایم ایف کا معاملہ جلد حل ہوجائے گا۔