اسلام آباد۔24اپریل (اے پی پی):وفاقی وزیر برائے ریاستی و سرحدی علاقہ جات و امور کشمیر و گلگت بلتستان انجینئر امیر مقام کو بدھ کے روز چیف کمشنر افغان مہاجرین محمد عباس خان نے مہاجرین سے متاثرہ اور میزبانی کے علاقے (راہا) پروگرام کے حوالے سے بریفنگ دی گئی۔چیف کمشنر برائے افغان مہاجرین خیبر پختونخواہ نے راہا پروگرام کے مختلف پہلوؤں پر تفصیلی روشنی ڈالی۔ چیف کمشنر افغان مہاجرین نے راہ پروگرام کے حوالے سے تفصیلی رپورٹ بھی وفاقی وزیر کو پیش کی۔ یہاں جاری بیان کے مطابق اس موقع پر وفاقی وزیر کو بتایا گیا کہ راہا پروگرام کا بنیادی مقصد افغان مہاجرین اور ان کی میزبان کمیونٹیز کے درمیان سماجی ہم آہنگی پیدا کرنا ہے۔انہوں نے کہا کہ اس کا مقصد ملک کی غریب برادریوں کو ترقی کے دھارے میں لانے کے لئے حکومت پاکستان کی کوششوں کی حمایت کرنا بھی ہے، انہوں نے کہا کہ اس کا مقصد افغان مہاجرین اور میزبان کمیونٹیز کے لیے روزگار کے مواقع پیدا کرنا بھی ہے۔وفاقی وزیر کو 2009 سے 2023 تک کے منصوبوں، فنڈنگ کی تفصیلات اور خیبرپختونخوا میں پی ٹی ایف کے تجویز کردہ منصوبوں کے بارے میں بھی بتایا گیا۔وفاقی وزیر کو راہا کے منصوبوں کے انتخاب کے معیار اور منظوری کے عمل سے بھی آگاہ کیا گیا۔انہوں نے کہا کہ راہا پروگرام کا مقصد افغان مہاجرین اور میزبان کمیونٹیز کی بحالی ہے تاکہ پاکستان کے تکثیری نقطہ نظر کی حمایت کی جا سکے۔ انہوں نے کہا کہ راہا پروگرام بہتر زندگی گزارنے کے لیے حاصل کردہ مہارتوں، تعلیم، صحت کی سہولیات اور پانی اور صفائی کی سہولیات پر توجہ مرکوز کرتا ہے اور انہیں ضروری پیشہ ورانہ اور زندگی کی مہارتوں کے ساتھ بااختیار بناتا ہے اور سب سے اہم سماجی ہم آہنگی پیدا کرتا ہے۔بریفنگ کے دوران وفاقی وزیر انجینئر امیر مقام نے اہداف کو مؤثر طریقے سے حاصل کرنے کے لئے وسائل کے زیادہ سے زیادہ استعمال کی اہمیت پر زور دیا۔انہوں نے عالمی برادری پر زور دیا کہ وہ افغان پناہ گزینوں کی بڑھتی ہوئی ضروریات کو پورا کرنے کے لیے مالی اعانت اور مدد میں اضافہ کرے جس کے لیے خاطر خواہ وسائل کی ضرورت ہے۔انہوں نے کہا کہ ہم اپنی سرحدوں کے اندر پناہ گزینوں کی حفاظت اور وقار کو یقینی بنانے کے لیے اپنا تعاون جاری رکھنے کے لئے پُرعزم ہیں۔