انڈیا کی بلاک بسٹر فلم ’کرن ارجن‘ میں اپنے کردار سے شہرت پانے والی 90 کی دہائی کی مقبول اداکارہ ممتا کلکرنی 25 سال بعد ممبئی واپس آگئیں۔
این ڈی ٹی وی کی ایک رپورت کے مطابق ممتا کلکرنی کی ممبئی آمد نے مداحوں اور میڈیا کی توجہ حاصل کرلی ہے۔اداکارہ ممتا کلکرنی پر ایک نیٹ منشیات کیس کی ایف آئی آر درج تھی جسے ممبئی کی عدالت نے ناکافی ثبوت کی بنا کر بالآخر خارج کرکے اداکارہ کو کلین چٹ دے دی ہے۔
اداکارہ نے 25 برس بعد اپنے آبائی شہر واپسی پر انسٹاگرام پر تصویر اور ویڈیو شیئر کرتے ہوئے جذباتی کیپشن بھی لکھا۔ انہوں نے ویڈیو میں بتایا کہ وہ 2000 میں اپنے ملک سے باہر گئی تھیں۔
ویڈیو میں اداکارہ کا مزید کہنا تھا کہ ’میں بہت جذباتی ہوں اور مجھے نہیں معلوم کہ اس کا اظہار کیسے کروں، جب میری پرواز یہاں اتری تو میں دائیں اور بائیں دیکھ رہی تھی اور میں نے اپنے ملک کو 24 سال بعد فضا سے دیکھا اور میں سخت جذباتی ہوگئی۔‘
انسٹاگرام پر شیئر کی گئی فوٹو کے کیپشن میں ممتا کلکرنی نے لکھا کہ ’25 برس بعد اپنے مادروطن واپسی، 2012 میں کمبھ میلے میں شرکت کے لیے آئی تھی اور اب 12 برسوں بعد 2025 میں ہونے والے کمبھ میلے میں شرکت کے لیے میں یہاں ہوں۔‘
View this post on Instagram A post shared by Mamta Kulkarni (@mamtakulkarniofficial____)
اداکارہ کی واپسی کی خبر پر ان کے مداحوں نے خوشی کا اظہار کرتے ہوئے ان کے فلمی کرداروں کو یاد کیا اور پوسٹ کے کمنٹس میں تہنیتی پیغامات لکھے۔
اداکارہ ممتا کلکرنی نے 1990 کی دہائی کی مشہور فلموں جیسے ’کرن ارجن‘ اور ’بازی‘ میں شاندار اداکاری کے ذریعے شہرت حاصل کی۔
اداکاری کے کیرئیر کے دوران ممتا کلکرنی نے شاہ رخ خان، سلمان خان اور عامر خان جیسے صف اول کے اداکاروں کے ساتھ کام کیا، تاہم 2000 کی دہائی کے اوائل میں ممتا کلکرنی بالی وڈ کو خیرباد کہہ کر بیرون ملک منتقل ہو گئیں جہاں انہوں نے شہرت اور میڈیا سے دور زندگی گزاری۔
اس دوران ان پر منشیات کا ایک بڑا کیس بھی بنایا گیا تھا جس کی ایف آئی آر حال ہی میں ممبئی ہائی کورٹ نے منسوخ کرتے ہوئے انہیں کلین چٹ دے دی۔