گلگت کے دنیور نالہ میں سیلاب سے متاثرہ واٹر چینل کی بحالی کے دوران مٹی کا تودا گرنے سے 8 مقامی رضاکار جاں بحق اور کم از کم 4 افراد زخمی ہو گئے۔ پولیس کے مطابق رضاکار متاثرہ نالے کی صفائی اور بحالی میں مصروف تھے کہ اچانک لینڈ سلائیڈنگ ہوئی جس کے باعث متعدد لوگ ملبے تلے دب گئے۔
ریسکیو ٹیموں کے مطابق ملبے تلے مزید افراد کے دبے ہونے کا خدشہ ہے جبکہ زخمیوں کو اسپتال منتقل کر دیا گیا ہے۔ اسپتالوں میں ایمرجنسی نافذ کر دی گئی ہے اور مقامی افراد بھی ریسکیو سرگرمیوں میں حصہ لے رہے ہیں۔
ترجمان صوبائی حکومت فیض اللہ فراق کا کہنا ہے کہ گلگت بلتستان میں موسمیاتی تبدیلیوں کے باعث گلیشیئر تیزی سے پگھل رہے ہیں جس سے شیشپر نالہ بپھر گیا ہے۔
سیلابی ریلے سے قراقرم ہائی وے کو شدید نقصان پہنچا اور شاہراہ ہنزہ ایک بار پھر بند ہو گئی ہے۔ زرعی زمینیں، درخت اور کھیت بہہ گئے ہیں جبکہ ٹریفک کو متبادل نگر روڈ سے گزارا جا رہا ہے۔