انقرہ ۔19اپریل (اے پی پی):ترکیہ کے صدر رجب طیب اردگان نے مغربی ممالک پر زور دیا کہ وہ اسرائیلی حکومت کی طرف سے فلسطینیوں کے قتل عام کا جواب دیں۔انہوں نے تنزانیہ کے دورے پر آئے ہوئے صدر سامیہ سلوہو حسن کے ساتھ مشترکہ پریس کانفرنس میں کہا کہ ہم نے مغربی ممالک کو ایران کی جوابی کارروائی پر متفقہ طور پر ردعمل دیتے ہوئے دیکھا ہے۔ انہی فریقوں کو اب فلسطین کے لیے متحد ہونے کی ضرورت ہے۔
انہوں نےان اقدامات پر تبادلہ خیال کیا جو مقبوضہ فلسطینی علاقوں میں ہونے والی بربریت کے خلاف اٹھائے جا سکتے ہیں۔انہوں نے کہا کہ غزہ میں ہونے والی بربریت کو چھپانے اور اسے ایجنڈے سے ہٹانےکی اسرائیل کی کوششوں کو موقع نہیں دیا جانا چاہیے۔ترک صدر نے کہا کہ اسرائیل اور فلسطینیوں کے درمیان تنازعہ میں جلد از جلد ایک فوری اور دیرپا جنگ بندی کا حصول ضروری ہے اور پھر دو ریاستی حل کے حصول کے لیے اقدامات کرنا ہوں گے۔
