لاہور کے علامہ اقبال انٹرنیشنل ایئرپورٹ پر آتشزدگی کے نتیجے میں پہلی حج پرواز سمیت شہر سے اندرون و بیرون ملک آپریٹ ہونے والی متعدد پروازیں تاخیر کا شکار ہوئیں۔
جمعرات کی صبح لاہور کے علامہ اقبال انٹرنیشنل ایئرپورٹ پر آتشزدگی کا واقعہ پیش آیا۔ مختلف ویڈیو کلپس میں دیکھا جا سکتا ہے کہ لوگ اپنا سامان گھسیٹ کر امیگریشن کاؤنٹر سے دور لے جا رہے ہیں جبکہ کاؤنٹرز پر دھوئیں کے بادل منڈلا رہے ہیں۔
ریسکیو حکام کے مطابق آگ تقریبا صبح پانچ بج کر 15 منٹ پر لگی اور آگ لگنے کے بعد سموک الارم نہیں بجا۔
آگ کی اطلاع ملنے کے بعد ایوی ایشن فائر بریگیڈ اور ریسکیو 1122 کے عملے نے جائے وقوعہ پر پہنچ کر آگ بجھانے کا عمل شروع کیا جبکہ آگ لگنے کے واقعے کے دوران ہی لاہور ایئرپورٹ کی اندرونی بلڈنگ کو خالی کروا لیا گیا۔
لاہور سے مدینہ جانے والی پہلی حج پرواز پی کے 717 بھی آتشزدگی کے باعث تاخیر کا شکار ہوئی۔
عینی شاہدین کے مطابق عازمین حج کو ایئرپورٹ لاؤنج سے نکال دیا گیا۔
آگ لگنے سے امیگریشن سسٹم میں خرابی کے باعث لاہور سے اندرون و بیرون ملک آپریٹ ہونے والی پروازیں تاخیر کا شکار ہوئیں تاہم صبح آٹھ بجے کے قریب تین پروازوں کو ایئرپورٹ پر اترنے کی اجازت دی گئی۔
ایوی ایشن ترجمان کے مطابق آگ لگنے کی وجوہات کا تعین کرنے کے لیے ایک اعلی سطح کی کمیٹی بنا دی گئی ہے جو تمام پہلوؤں کا جائزہ لے گی جبکہ بہت جلد فلائٹ آپریشن مکمل طور پر بحال ہو جائیں گے۔