سعودی وزارت حج و عمرہ نے عمرہ پرمٹ کا اجراء معطل

مکہ ۔23مئی (اے پی پی):سعودی وزارت حج و عمرہ نےحج سیزن شروع ہونے پر’’نسک‘‘ ایپلیکیشن کے ذریعے عمرہ پرمٹ کے اجراء کو 15 ذوالقعدہ سے 15 ذوالحجہ1445 ھ تک معطل کرنے کا اعلان کیا ہے۔ سوشل میڈیا پوسٹ پر جاری پیغام میں سعودی وزارت حج و عمرہ نے واضح کیا ہے کہ کسی بھی قسم کا وزٹ ویزا رکھنے والے غیر ملکی شہریوں کو 15 ذوالقعدہ سے 15 ذوالحجہ 1445ھ تک مکہ میں داخل ہونے یا یہاں قیام کرنے کی اجازت نہیں ہو گی۔

وزارت کی طرف سے مزید کہا گیا ہے کہ باقاعدہ عازمین حج کی سہولت اور ان کے لئے فریضہ حج کی ادائیگی کو آسان بنانے کی غرض سے صرف حج ویزہ رکھنے والوں کو ہی اس عرصہ کے دوران مکہ مکرمہ میں داخل ہونے کی اجازت ہو گی ۔وزارت نے اس بات پر زور دیا کہ فریضہ حج کی ادائیگی کے لئے درست پرمٹ ضروری ہے اور متعلقہ ضوابط کی خلاف ورزی کرنے والوں، خاص طور سے باقاعدہ عازمین حج کے لئے مختص علاقوں میں پائے جانے والوں کو جرمانے کئے جائیں گے۔