خیبر پختونخوا محکمہ بلدیات نے محکمہ خزانہ کو خط ارسال کرتے ہوئے کیپٹل میٹروپولیٹن گورنمنٹ پشاور کے ملازمین کی اگست کی تنخواہوں اور پنشنز کی ادائیگی کے لیے 15 کروڑ 76 لاکھ روپے کے اضافی فنڈز کی فوری فراہمی کی درخواست کی ہے۔
محکمہ بلدیات کی جانب سے جاری کردہ مراسلے میں کہا گیا ہے کہ سیکریٹری لوکل کونسل بورڈ کے خط کی روشنی میں فنڈز کی عدم دستیابی کے باعث ملازمین اور پنشنرز کو گزشتہ ماہ کی ادائیگیاں تاحال ممکن نہیں ہوسکیں۔
مراسلے میں محکمہ خزانہ سے استدعا کی گئی ہے کہ قواعد و پالیسی کے تحت فوری طور پر درکار گرانٹ جاری کی جائے تاکہ واجبات کی بروقت کلیئرنس اور ملازمین کو مالی مشکلات سے نجات دلائی جاسکے۔