وزیراعلیٰ سندھ سید مراد علی شاہ نے بھارتی حملوں کے نتیجے میں شہید ہونے والوں کے لواحقین اور زخمیوں کے لیے مالی امداد کا اعلان کیا ہے۔
زرائع کے مطابق کراچی میں تقریب سے خطاب کرتے ہوئے وزیراعلیٰ سندھ نے کہا کہ شہدا کے لواحقین کے لیے فی خاندان ایک کروڑ جبکہ زخمی ہونے والوں کو فی کس 10، 10 لاکھ روپے دیے جائیں گے۔
وزیراعلیٰ نےاپنے خطاب میں کہا کہ پہلگام واقعہ سوچی سمجھی سازش تھی، بھارت نے رات کے اندھیرے میں پاکستان پر حملہ کرکے نہتے پاکستانیوں کو شہید کیا۔ اللہ نے مشکل وقت میں ہماری مدد کی اور بھارتی جارحیت کے خلاف قوم سیسہ پلائی دیوار کی طرح مضبوط رہی۔
انہوں نے کہا کہ بھارت نے رافیل توخرید لیے مگر ( ان کے پاس ) چلانے والے ( پائلٹ ) نہیں ہیں۔ وزیراعلیٰ سندھ نے کہا کہ افواج پاکستان نے ثابت کیا کہ ملک کے دفاع کے لیے ہر وقت تیار ہیں، پاکستان کی طرف میلی آنکھ سے دیکھنے والے کی آنکھیں نکال دیں گے۔
وزیراعلیٰ سندھ مراد علی شاہ نے کہا کہ بھارت سندھ طاس معاہدہ ختم نہیں کرسکتا، بلاول بھٹو زرداری نے کہا ہے کہ دریائے سندھ میں پانی بہے گا یا مودی کا خون۔