بلوچستان اسمبلی نے مارگٹ میں غیرت کے نام پر مر د اور خاتون کے قتل میں ملوث ملزمان کو قرار واقعی سزا دینے سے متعلق مشترکہ مذمتی قرار داد منظور کر لی۔
بلوچستان اسمبلی کا اجلاس اسپیکر عبدالخالق اچکزئی کی زیر صدارت ہوا، اس موقع پر ڈپٹی اسپیکر بلو چستان اسمبلی غزالہ گولہ نے مارگٹ میں مرد اور خاتون کے قتل میں ملوث ملزمان کو قرار واقعی سزا دینے سے متعلق مشترکہ قرار داد پیش کی ۔
قرارداد کی حمایت میں صوبائی وزیر تعلیم راحیلہ درانی اور مشیر کھیل مینہ مجید نے کہا کہ خواتین کا قتل کسی بھی طور غیرت نہیں کہلا سکتا، واقعے میں ملوث تمام ملزمان بشمول سردار کو کیفر کردار تک پہنچایا جائے۔
رکن اسمبلی فرح عظیم شاہ نے سوال اٹھایا کہ ماں، بہن اور بیٹی کو قتل کرنا کہاں کی غیرت ہے؟
نور محمد دمڑ نے کہا کہ جرگے کا فیصلہ جذباتی تھا اور ویڈیو بنا کر قتل کرنا ناقابل قبول ہے، ایوان نے مارگٹ واقعے سے متعلق مشترکہ مذمتی قرار داد منظور کرلی۔
بعدازاں بلو چستان اسمبلی کا اجلاس 25 جولائی سہ پہر 3 بجے تک ملتوی کر دیا گیا۔