ضلع کرم کے سرحدی علاقے پیواڑ میں بارودی سرنگ پھٹنے سے ایک شخص جاں بحق اور اس کا بیٹا شدید زخمی ہوگیا۔
پولیس کے مطابق واقعہ خمزے کے پہاڑی علاقے میں اس وقت پیش آیا جب باپ بیٹا لکڑیاں کاٹنے کے لیے جا رہے تھے۔ کچے راستے میں نصب بارودی سرنگ دھماکے سے حسن غلام موقع پر جاں بحق ہوگیا جبکہ اس کا بیٹا صادق حسین زخمی ہوا۔ لاش اور زخمی کو ڈسٹرکٹ ہیڈ کوارٹر اسپتال پاراچنار منتقل کر دیا گیا۔
پولیس کے مطابق فوری طور پر کسی گروہ نے واقعے کی ذمہ داری قبول نہیں کی۔ قبائلی عمائدین نے اس سانحے کی شدید مذمت کرتے ہوئے حکومت سے مطالبہ کیا ہے کہ علاقے سے بارودی سرنگوں کی صفائی کی جائے اور اس قسم کی دہشتگرد کارروائیوں میں ملوث عناصر کو سخت سزا دی جائے۔
ڈی پی او کرم ملک حبیب کا کہنا ہے کہ پولیس حکام نے واقعے کی تحقیقات شروع کر دی ہیں۔