اسلام آباد : صدر مملکت آصف علی زرداری اور وزیرِ اعظم محمد شہباز شریف نے عوامی جمہوریہ چین کی حکومت اور عوام کو اُن کے 76ویں قومی دن کے موقع پر مبارکباد پیش کرتے ہوئے کہا ہے کہ پاکستان اور چین کی آزمودہ دوستی مزید مضبوط ہورہی ہے۔
بدھ کو ایوان صدر کے پریس ونگ سے جاری بیان کے مطابق صدر مملکت نے چین کے 76 ویں قومی دن کے موقع پر جاری پیغام میں کہا کہ پاکستان کے عوام اپنے چینی بھائیوں اور بہنوں کے ساتھ اس دن کی خوشیاں مناتے ہیں جو چین کے ترقی کے شاندار سفرِ اور اتحاد کی علامت ہے۔
صدر مملکت نے کہا کہ صدر شی جن پنگ کی بصیرت افروز قیادت چین کو ترقی کی نئی بلندیوں تک لے گئی ہے۔ چین کے مشترکہ خوشحالی اور عالمی تعاون کے وژن کو پاکستان کی حمایت حاصل ہے۔ چین کا ترقی، اتحاد اور اختراع کا شاندار سفر قابل فخر ہے۔ صدر مملکت نے کہا کہ میرے چین کے حالیہ دوروں سے دونوں ہمسایہ اور دوست ممالک کے درمیان تجارت اور بنیادی ڈھانچے کے روابط کے فروغ کے ساتھ ساتھ اسٹریٹجک اور سیکیورٹی تعاون کے عزم کو مزید تقویت ملی ہے۔
صدر مملکت نے کہا کہ سائنس، تعلیم، ٹیکنالوجی اور ثقافت میں تعاون کے ذریعے مضبوط عوامی تعلقات ہماری دیرپا شراکت داری کی بنیاد ہیں۔ صدر مملکت نے چین کے عوام کی خوشحالی اور صدر شی جن پنگ کامیابیوں کے لئے نیک تمناوں کا اظہار کرتے ہوئے کہا کہ ہماری دوستی آنے والے برسوں میں مزید پروان چڑھے گی۔
دوسری جانب وزیرِ اعظم محمد شہباز شریف نے چین کے عوام کی ترقی، خوشحالی اور کامیابی کے لیے نیک خواہشات کا اظہار کرتے ہوئے کہا ہے کہ پاکستان کو چین کے ساتھ اپنے برادرانہ تعلقات پر فخر ہے، دونوں ممالک دوستی اور شراکت داری میں نئے سنگِ میل عبور کریں گے۔
وزیراعظم آفس کے میڈیا ونگ کی طرف سے جاری بیان کے مطابق وزیراعظم نے حکومتِ پاکستان اور پاکستانی عوام کی جانب سے عوامی جمہوریہ چین کے 76ویں قومی دن کے موقع پر چین کی قیادت اور برادر عوام کو مبارکباد دیتے ہوئے اس مبارک دن پر چین کے عوام کی ترقی، خوشحالی اور کامیابی کے لیے نیک خواہشات کا اظہار کیا۔