پاکستان اور جنوبی افریقہ کے درمیان جاری دوسرے اور آخری ٹیسٹ کے پہلے دن کا اختتام ہو گیا ہے۔
راولپنڈی کرکٹ سٹیڈیم میں ہونے والے میچ کا ٹاس پاکستان نے جیت کر بیٹنگ کا فیصلہ کیا تھا اور دن کے اختتام تک پاکستان نے 5 وکٹوں کے نقصان پر 259رنز بنا لیے ہیں۔
پاکستان کی جانب سے محتاط آغاز کے باوجود امام الحق زیادہ دیر نہ ٹھہر سکے اور 17 کے سکور پر بولڈ ہو گئے، ان کے بعد آنے والے شان مسعود اور عبداللہ شفیق ذمہ دارانہ طور پر آگے بڑھتے رہے اور نصف سینچریز کرنے میں کامیاب رہے تاہم یہ پارٹنرشپ اس وقت ٹوٹی جب عبداللہ شفیق 57 رنز پر آؤٹ ہو گئے۔
ان کے بعد آنے والے بابر اعظم صرف 16 رنز ہی بنا پائے جبکہ ان کے بعد سعود شکیل بیٹنگ کے لیے آئے۔
پاکستان کے کپتان شان مسعود اچھی فارم میں نظر آ رہے تھے اور سینچری بنانے کے قریب ہی تھے کہ کیشو مہاراج کی گیند پر 87 رنز بنا کر کیچ آؤٹ ہو گئے۔
شان مسعود کی وکٹ کے بعد محمد رضوان نے کریز سنبھالی لیکن وہ زیادہ دیر تک میدان میں موجود نہ رہ سکے اور 19 رنز بنا کر کگیسو ربادا کے ہاتھوں آؤٹ ہوگئے۔
جنوبی افریقہ کی جانب سے سائمن ہارمر اور کیشو مہاراج نے دو، دو جبکہ کگیسو ربادا نے ایک وکٹ حاصل کی۔
پاکستان کی ٹیم میں ایک تبدیلی کی گئی ہے اور حسن علی کو ڈراپ کرتے ہوئے آصف آفریدی کو موقع دیا گیا ہے جو آج ٹیسٹ کرکٹ میں اپنا ڈیبیو کر رہے ہیں۔
اس سے قبل لاہور کے قذافی سٹیڈیم میں ہونے والے پہلے ٹیسٹ میں پاکستان نے جنوبی افریقہ کو 93 رنز سے شکست دے کر سیریز میں ایک صفر کی برتری حاصل کر لی تھی۔
پاکستانی پلیئنگ الیون
پاکستان کی جانب سے میدان میں اترنے والی ٹیم میں ٹیم شان مسعود (کپتان)، عبداللہ شفیق، امام الحق، بابر اعظم، سعود شکیل، محمد رضوان، سلمان علی آغا، نعمان علی، ساجد خان، آصف آفریدی اور شاہین شاہ آفریدی شامل ہیں۔
جنوبی افریقن ٹیم
مہمان ٹیم ایڈم مارکرم (کپتان)، ریان رکلٹن، ٹرسٹن سٹبز، ٹونی ڈی زورزی، ڈیوالڈ بریوس، کائل ویریین، سینوران متھوسوامے، مارکو جینسن، سمن ہارمر، کیشو مہاراج اور کگیسو ربادا پر مشتمل ہے۔