تمہیں وطن کی ہوائیں سلام کہتی ہیں۔۔ ملک بھر میں پاک فوج کے جوانوں کا شاندار استقبال ! ویڈیو

سیالکوٹ میں جذبہ وطن پرستی دیدنی منظر بن گیا جب سرحد کے قریب پہنچنے والی پاک فوج کی گاڑیوں کا شہریوں نے والہانہ استقبال کیا۔ لوگ ہاتھوں میں سبز ہلالی پرچم تھامے، گھروں سے باہر نکل آئے اور وطن کے محافظوں پر پھول نچھاور کیے۔

سڑکوں پر موجود عوام نے "پاک فوج زندہ باد" کے فلک شگاف نعرے لگائے، جوانوں کو گلدستے پیش کیے اور محبت میں انہیں پھولوں کے ہار پہنائے۔ فوجی جوانوں نے بھی پرجوش انداز میں "پاکستان زندہ باد" کا جواب دے کر عوام کے جذبے کو سلام پیش کیا۔

یہ مناظر صرف سیالکوٹ تک محدود نہ رہے۔ ملک کے مختلف حصوں میں بھی لوگ پاک فوج سے اظہار یکجہتی کے لیے گھروں سے نکلے، مٹھائیاں بانٹیں اور ملک سے محبت کے گیت گنگناتے رہے۔

عوام کا یہی جذبہ بتاتا ہے کہ جب بھی ملک کو خطرہ لاحق ہو، سویلین اور سپاہی ایک ساتھ ایک صف میں کھڑے ہوتے ہیں — جیسے ایک سیسہ پلائی ہوئی دیوار۔