اداکارہ ماہرہ خان نے اپنی اور ہمایوں سعید کی پرانی تصویر پر تبصرہ کرتے ہوئے کہا کہ وقت کے ساتھ ہمارے ہونٹ چھوٹے ہوگئے ہیں۔
ماہرہ خان اور ہمایوں سعید نے ایک یوٹیوب پروگرام میں شرکت کی، جہاں دونوں نے مختلف موضوعات پر کھل کر گفتگو کی۔
پاک بھارت کشیدگی کے دوران فلم ریلیز نہ ہونے کے خدشے کا ذکر کرتے ہوئے ماہرہ خان نے کہا کہ ایسا لگ رہا تھا کہ شاید فلم ریلیز ہی نہ ہو، ہم دونوں کراچی میں تھے اور حالات کو دیکھتے ہوئے دل سے فلم کا خیال نکال چکے تھے۔
ماہرہ خان نے ہمایوں سعید کے ساتھ تعلق پر بات کرتے ہوئے کہا کہ ہم ایک دوسرے کی بہت عزت کرتے ہیں، چونکہ ہمایوں مجھ سے عمر میں بڑے ہیں، اس لیے میں انھیں ہمیشہ ’آپ‘ کہتی ہوں، یہاں تک کہ جب غصے میں بھی ہوتی ہوں تو ’آپ‘ ہی کہتی ہوں۔
انٹرویو کے دوران ماہرہ خان نے مزاحیہ انداز میں کہا کہ دس سال میں زیادہ تبدیلی نہیں آئی، بس پہلے ہم زیادہ انرجیٹک تھے لیکن اب کچھ کم ہیں، جس پر ہمایوں سعید نے مسکراتے ہوئے کہا کہ ماہرہ اب بھی اتنی ہی انرجیٹک ہیں۔
ہمایوں سعید نے بتایا کہ ایک فلائٹ کے دوران ماہرہ نے دونوں کی دس سال پرانی تصویر دکھاتے ہوئے کہا کہ دیکھیں ہمایوں، عمر کے ساتھ ہمارے ہونٹ چھوٹے ہوگئے۔
ماہرہ خان نے کہا کہ ہمارا ردعمل کافی مزاحیہ تھا، ہم نے تصویروں کا موازنہ کیا تو لگا کہ واقعی عمر کے ساتھ ہونٹ سوکھ جاتے ہیں۔
اپنی آنے والی فلم ’لو گُرُو‘ کے بارے میں بات کرتے ہوئے ماہرہ خان نے بتایا کہ یہ ایک رومانوی مزاحیہ فلم ہے، کہانی بہت دلچسپ ہے اور مجھے یقین ہے ناظرین کو ضرور پسند آئے گی۔
فلم کے ٹریلر کی نیویارک کے ٹائمز اسکوائر پر لانچنگ کے بارے میں بات کرتے ہوئے ماہرہ خان نے کہا کہ یہ ایک ناقابلِ بیان لمحہ تھا، جو جذبات اس وقت محسوس کیے، وہ الفاظ میں بیان نہیں ہوسکتے۔
فلم ’لو گُرُو‘ عیدالاضحیٰ سے ایک دن قبل، 6 جون کو سینما گھروں کی زینت بنے گی، یہ دونوں اداکاروں کی تقریباً تین سال بعد بڑے پردے پر واپسی کا سبب بھی بنے گی۔
اگرچہ فلم ٹریلر مکمل کہانی ظاہر نہیں کرتا، تاہم اندازہ ہوتا ہے کہ ہمایوں سعید فلم میں ایک لاپرواہ عاشق کے کردار میں نظر آئیں گے، جو بعد میں ماہرہ خان کے والد (جاوید شیخ) کی طرف سے سونپی گئی ایک اہم ذمے داری کے بعد سچی محبت میں مبتلا ہوجاتے ہیں۔