کم وقت میں اچھی اور گہری نیند کے مزے لینے کے لیے جاپان نے نیند میں مدد دینے والی اسمارٹ جیکٹ متعارف کرا دی۔
جاپانی ڈیزائن فرم کونیل نے ایسی پفر جیکٹ تیار کی ہے جو روشنی اور موسیقی کی مدد سے انسان کو کہیں بھی سُلا سکتی ہے۔ یہ جیکٹ پہننے والے کی دل کی دھڑکن اور جسمانی درجہ حرارت جیسے بایو میٹرک ڈیٹا کی بنیاد پر مخصوص آوازیں اور لائٹنگ پیدا کرتی ہے، تاکہ نیند کے لیے موزوں ماحول بن سکے۔
یہ جیکٹ بظاہر ایک عام لیکن اوور سائز پَفر جیکٹ ہے، جسے چلتے پھرتے بھی پہنا جا سکتا ہے، لیکن اس کی خاص بات اس کا سلیپ موڈ ہے جو صرف ہُڈ چڑھانے سے فعال ہو جاتا ہے۔ جیکٹ میں لگے سینسر صارف کی نیند اور ذہنی دباؤ کو مسلسل مانیٹر کرتے رہتے ہیں۔
آپ کو یہ جان کر بھی حیرت ہوگی کہ جاپان کو اکثر دنیا کی سب سے زیادہ نیند سے محروم قوموں میں سے ایک بتایا جاتا ہے، بین الاقوامی سروے اور نیند کے دورانیے اور معیار سے متعلق ریسرچ اسٹڈیز میں بھی جاپان بار بار آخری نمبر پر آتا ہے۔
کونیل کے تخلیقی آرٹ ڈائریکٹر ڈائی میاتا نے میڈیا کو بتایا کہ آپ کسی کو سونے پر مجبور نہیں کر سکتے، اسے خود ہی سونا پڑتا ہے لیکن ہم نے سوچنا شروع کیا کہ کیا ہم کوئی ایسی چیز بنا سکتے ہیں جو لوگوں کو ان کی اپنی شرائط پر سونے میں مدد دے؟ اور پھر ہم نے یہ پفر جیکٹ تیار کی، جسے The ZZZN کا نام دیا گیا ہے۔
یہ جیکٹ ابھی صارفین کے لیے پیش نہیں کیا گیا ہے بلکہ اس کا پروٹوٹائپ تیار کیا گیا ہے، جسے 24 جون سے 7 جولائی تک ایکسپو 2025 اوساکا میں نمائش کے لیے پیش کیا جائے گا، جہاں لوگ خود اس کی جانچ کر سکیں گے، کمپنی کے آرٹ ڈائریکٹر نے امید ظاہر کی ہے کہ یہ ایجاد لوگوں کو نیند کے بارے میں زیادہ تجسس پر ابھارے گی۔