واٹس ایپ اب محض ایک میسجنگ ایپ نہیں رہا، بلکہ تیزی سے ایک ذہین اور جدید کمیونیکیشن پلیٹ فارم میں تبدیل ہو رہا ہے۔
میٹا کی مصنوعی ذہانت (AI) ٹیکنالوجی کی بدولت اب صارفین کو ایسی سہولیات میسر آرہی ہیں جو نہ صرف بات چیت کو تیز، آسان اور مؤثر بنائیں گی بلکہ پرائیویسی کا بھی مکمل خیال رکھیں گی۔
دنیا بھر میں واٹس ایپ ایک سادہ چیٹ ایپ سے نکل کر ایک سمارٹ کمیونیکیشن ٹول بن چکا ہے۔ میٹا کی AI ٹیکنالوجی نے اسے مزید محفوظ، سہل اور طاقتور بنا دیا ہے۔
یہاں ہم واٹس ایپ کی پانچ زبردست AI خصوصیات کا ذکر کر رہے ہیں، جو آپ کے روزمرہ کے استعمال کے انداز کو یکسر بدل سکتی ہیں۔
آئیے جانتے ہیں واٹس ایپ کی وہ شاندار پانچ بہترین اے آئی خصوصیات کیا ہیں۔
1. پیغامات کا خلاصہ
واٹس ایپ کا کہنا ہے کہ اگر آپ کسی چیٹ میں بہت سارے میسجز مس کر چکے ہیں، تو اب آپ کو ہر ایک میسج پڑھنے کی ضرورت نہیں۔ واٹس ایپ کی اے آئی اب تمام لمبی گفتگو کا خلاصہ بنا کر آپ کو مختصر انداز میں دے دیتی ہے۔ یہ فیچر پرائیویٹ پراسیسنگ پر مبنی ہے، یعنی آپ کا ڈیٹا واٹس ایپ یا میٹا کے پاس محفوظ نہیں ہوتا۔
2. ایک سے زیادہ چیٹس کے لئے کوئیک ری کیپ
یہ نیا فیچر ایک ساتھ پانچ مختلف چیٹس کے خلاصے دیکھنے کی سہولت فراہم کرے گا۔ خاص طور پر وہ افراد جو گروپ یا بزنس چیٹس مینیج کرتے ہیں، ان کے لیے یہ فیچر بہت فائدہ مند ہوگا۔ فی الحال یہ محدود صارفین کے لیے ہے، لیکن جلد ہی سب کے لیے دستیاب ہوگا۔
3. اسپیم اور اسکیم وارننگ
پاکستان میں حالیہ واٹس ایپ فراڈ کے بڑھتے ہوئے کیسز کے پیش نظر، یہ فیچر خاص اہمیت رکھتا ہے۔ اے آئی کی مدد سے واٹس ایپ مشکوک میسجز، لنکس اور فارورڈنگ پیٹرن کو پہچان کر آپ کو وارننگ دیتا ہے یا مواد کو بلاک کر دیتا ہے، بغیر آپ کے پیغامات پڑھے۔ یہ سسٹم ہر ماہ 65 ملین سے زائد نقصان دہ پیغامات کو خودکار طور پر بلاک کر رہا ہے۔
4. اسمارٹ تحریری تجاویز
واٹس ایپ پر اب اے آئی آپ کو میسج لکھنے میں مدد دے گا۔ چاہے وہ گرامر کی اصلاح ہو، لہجے کی تبدیلی ہو یا جواب دینے کے لیے فوری تجاویز، یہ فیچر پروفیشنل یا مصروف افراد کے لیے بہترین ہے۔ سب کچھ انکرپشن کے تحت ہوگا، اور جسے میسج بھیجا جائے گا، اُسے پتا بھی نہیں چلے گا کہ یہ اے آئی سے لکھا گیا ہے۔
5. وائس چیٹ کے ذریعے AI سے بات
کچھ ممالک میں صارفین میٹا آے آئی سے وائس کے ذریعے بات کر سکتے ہیں، اور جواب بھی آواز میں حاصل کرتے ہیں۔ یہ فیچر ابھی محدود پیمانے پر ہے، لیکن مستقبل میں یہ ہینڈز فری اے آئی مدد فراہم کرنے میں اہم کردار ادا کرے گا، بالکل چیٹ جی پی ٹی یا گوگل جیمنائی کی طرح۔
ان میں سے کئی فیچرز ابھی بیٹا کے تجرباتی مرحلے میں ہیں اور دنیا کے مختلف حصوں میں آہستہ آہستہ متعارف کروائے جا رہے ہیں، اس لیے پاکستان میں سب فیچرز تک رسائی میں یقینا کچھ وقت لگ سکتا ہے۔