پاکستان اور افغانستان کے درمیان خیبر پختونخوا اور بلوچستان کی سرحدوں پر شدید جھڑپیں ہوئی ہیں۔ پاکستانی سکیورٹی ذرائع کا کہنا ہے کہ سنیچر کو افغانستان کی طرف سے پاکستانی پوسٹوں پر بِلااشتعال فائرنگ کی گئی جس کا پاکستانی فوج نے بھرپور اور شدید جواب دیا ہے۔پاکستانی سکیورٹی ذرائع کے مطابق ’افغان فورسز نے پاکستان افغانستان بارڈر پر انگور اڈہ، باجوڑ، کرم، دیر، چترال، اور بارام چاہ (بلوچستان) کے مقامات پر بِلااشتعال فائرنگ کی۔ فائرنگ کا مقصد خوارج کی تشکیلوں کو بارڈر پار کروانا بھی تھا۔‘’پاکستان فوج کی چوکس اور مستعد پوسٹوں کی جانب سے تیزی کے ساتھ بھرپور اور شدید جواب دیا گیا جو اب بھی جاری ہے۔‘سکیورٹی ذرائع کے مطابق ’پاکستانی فورسز کی جانب سے مؤثر اور شدید جوابی کارروائی سے متعدد افغان فوجی ہلاک اور خارجی تشکیلیں تتر بتر ہو گئیں، جبکہ افغان پوسٹیں خارجیوں کو کور فائر دینے میں بھی ناکام رہیں۔‘سیکورٹی ذرائع نے مزید کہا ہے کہ ’عبوری افغان حکومت کی سرپرستی میں چلنے والے افغانستان کے اندر خوارج اور داعش کے ٹھکانوں کو مؤثر طریقے سے نشانہ بنایا جا رہا ہے۔ پاکستان کی جانب سے آرٹلری، ٹینکوں، ہلکے اور بھاری ہتھیاروں کا استعمال کیا جا رہا ہے۔‘’اس کے علاوہ داعش اور خارجی ٹھکانوں کو نشانہ بنانے کے لیے فضائی وسائل اور ڈرونز کا بھی استعمال کیا جا رہا ہے۔ افغان فورسز کے اُن ہیڈکوارٹرز کو بھی نشانہ بنایا جا رہا ہے جو داعش اور فتنہ الخوارج کو پنا دیتے رہے ہیں۔‘
سکیورٹی ذرائع نے مزید کہا کہ ’طالبان اپنی متعدد پوسٹیں چھوڑ کر فرار ہو گئے ہیں اور ان کی لاشیں بکھری ہوئی ہیں۔‘
’افغانستان کی جانب سے یہ جارحیت اُس وقت کی جا رہی ہے جب افغان وزیر خارجہ انڈیا کا دورہ کر رہے ہیں۔‘فرانسیسی خبر رساں ادارے اے ایف پی کے مطابق دونوں ممالک کے حکام نے تصدیق کی ہے کہ سنیچر کی رات دیر گئے افغان اور پاکستانی سکیورٹی فورسز کے درمیان مشترکہ سرحد پر شدید جھڑپیں ہوئیں، جبکہ افغانستان نے پاکستان پر کابل میں فضائی حملے کرنے کا الزام عائد کیا ہے۔سکیورٹی فورسز کے مطابق ’پاکستانی فوج نے فوری طور پر شدید ردعمل دیتے ہوئے متعدد افغان پوسٹوں کو مؤثر طریقے سے نشانہ بنایا۔‘ (فائل فوٹو: اے ایف پی)افغان فوج نے اپنے بیان میں کہا کہ ’پاکستانی فورسز کے فضائی حملوں کے جواب میں مشرقی سرحد پر طالبان کی سرحدی فورسز نے مختلف سرحدی علاقوں میں پاکستانی چیک پوسٹوں پر شدید فائرنگ کی۔‘خیال رہے کہ جمعے کو افغانستان کی طالبان حکومت نے دارالحکومت میں دو دھماکوں کے بعد پاکستان پر ’کابل کی علاقائی خودمختاری کی خلاف ورزی‘ کا الزام عائد کیا تھا۔طالبان پہلے بھی اسلام آباد پر سرحدی حملوں کا الزام لگاتے رہے ہیں لیکن یہ پہلی بار تھا کہ انہوں نے اپنی سرزمین پر کارروائی کا الزام پاکستان پر لگایا اور اسے ایک ’غیرمعمولی کارروائی‘ قرار دیا۔کابل میں وزارت دفاع نے سوشل میڈیا پر ایک پوسٹ میں کہا کہ ’پاکستان نے افغانستان کی فضائی حدود کی خلاف ورزی کی، ڈیورنڈ لائن کے قریب پکتیکا کے علاقے مارغی میں ایک شہری مارکیٹ پر بمباری کی اور کابل کے خودمختار علاقے کی بھی خلاف ورزی کی۔‘