پاکستانی ایف ایم ریڈیو سٹیشنز پر بھارتی گانوں کی نشریات بند کردی گئیں ۔
تفصیلات کے مطابق وزارت اطلاعات نے ایف ایم ریڈیو اسٹیشنز پر بھارتی گانے نشر نہ کرنے کا خیرمقدم کرتے ہوئے کہا کہ تیزی سے بدلتی صورتحال میں پی بی اے کا یہ محب وطن اقدام قابل تحسین ہے، بھارتی گانوں کی بندش کا فیصلہ پوری قوم کے جذبات کی بھرپور ترجمانی کرتا ہے، فیصلہ قومی یکجہتی کے مضبوط جذبے کی عکاسی کرتا ہے، پی بی اے کا اقدام ملک کی خودمختاری اور وقار کو اجاگر کرتا ہے۔
عطا اللہ تارڑ کا کہناتھا کہ ہم آزمائش کی ہرگھڑی میں قومی اتحاد، یکجہتی اور بنیادی اقدار کے فروغ کیلئےمتحد ہیں۔ وزیر اطلاعات نے میڈیا سے وابستہ تمام اسٹیک ہولڈرز کی کاوشوں کو سراہتے ہوئے کہا کہ قومی مفاد میں حکومتی کوششوں کا ساتھ دینا قابل تحسین ہے، ہم سب اتحاد، امن اور حب الوطنی کے فروغ کے لیے سرگرم عمل ہیں۔