سندھ بھر میں 28 مئی کو یومِ تکبیر کے موقع پر عام تعطیل کا اعلان کیا گیا ہے۔ صوبائی حکومت کی جانب سے بدھ کے روز جاری کیے گئے نوٹیفکیشن میں واضح کیا گیا ہے کہ اس دن سرکاری دفاتر سمیت تمام نجی ادارے بند رہیں گے۔
یومِ تکبیر کی مناسبت سے یہ چھٹی پاکستان کے ایٹمی طاقت بننے کی یاد میں دی جاتی ہے، جب 1998 میں ملک نے چاغی کے پہاڑوں میں کامیاب ایٹمی تجربات کیے تھے۔
ادھر پاکستان اسٹاک ایکسچینج نے بھی ایک اعلامیہ جاری کیا ہے جس میں بتایا گیا ہے کہ اسٹاک مارکیٹ 28 مئی کو بند رہے گی۔ اس روز ملک بھر میں مختلف تقریبات اور یادگاری پروگرامز بھی متوقع ہیں جن کا مقصد قومی طاقت اور خودمختاری کو خراج تحسین پیش کرنا ہوگا۔