پاکستان میں عیدالاضحیٰ کی تاریخ سے متعلق اہم پیشگوئی سامنے آئی ہے۔ معروف ماہرِ فلکیات ڈاکٹر فہیم ہاشمی نے کہا ہے کہ اس بار ذوالحج کا چاند 28 مئی کو دکھائی دینے کے قوی امکانات ہیں، جس کے نتیجے میں عید قربان 7 جون بروز ہفتہ منائے جانے کی توقع ہے۔
ڈاکٹر فہیم ہاشمی کے مطابق 27 مئی کی شام کو چاند کی عمر صرف 11 گھنٹے ہوگی، جو رویت کے لیے ناکافی سمجھی جاتی ہے۔ اس روز چاند نظر آنے کا امکان تقریباً معدوم ہے۔
تاہم 28 مئی کو چاند کی عمر 35 گھنٹے سے زائد ہو چکی ہوگی، اس لیے اس دن آسمان پر چاند کے نمودار ہونے کے واضح امکانات موجود ہیں۔ اگر ایسا ہوتا ہے تو ذوالحج کی پہلی تاریخ 29 مئی کو ہوگی اور عیدالاضحیٰ 7 جون کو ملک بھر میں منائی جائے گی۔
ماہرین کا کہنا ہے کہ موسمی حالات اور چاند کی پوزیشن کے پیش نظر یہ پیشگوئی خاصی قابلِ اعتبار ہے، البتہ حتمی فیصلہ مرکزی رویتِ ہلال کمیٹی کے اعلان کے بعد ہی ہوگا۔