ڈیفنس میں مسجد کے اندر قتل کیے گئے سینئر وکیل کے قتل کیس کی تحقیقات کے لیے کمیٹی قائم کردی گئی۔
ڈی آئی جی ساؤتھ زون کی زیر نگرانی کمیٹی تفتیش اور پراسیکیوشن کی پیش رفت کا جائزہ لے گی، کمیٹی میں سندھ ہائی کورٹ بار ایسوسی ایشن کے رہنما اور پولیس افسران شامل ہیں۔
مقتول وکیل کے قتل کی ایف آئی آر نمبر 593/2025 تھانہ درخشاں تھانے میں درج ہے جس میں 302، 324،109، 34، 7ATA کی دفعات شامل ہیں۔
شمس الاسلام کے قتل کی تحقیقات کے لیے قائم کی گئی کمیٹی میں بار ایسوسی ایشن کے صدر بیرسٹر سرفراز علی میتلو سمیت چار نمائندے جبکہ پولیس اور پراسیکیوشن کی جانب سے ڈی آئی جی اسد رضا، ڈی پی پی اسد میتلو، ایس ایس پی محظور علی شامل ہیں، کمیٹی کیس کی مؤثر پیروی اور انصاف کی فراہمی یقینی بنائے گی۔