گلستان جوہر میں مقتول نوجوانوں کی نماز جنازہ، وادی حسین میں تدفین

پہلوان گوٹھ میں فائرنگ سے جاں بحق دو افراد کی نماز جنازہ ادا کرنے کے بعد وادی حسین قبرستان میں تدفین کردی گئی۔

گلستان جوہر میں گزشتہ روز فائرنگ سے جاں بحق سید مظہر عباس اور علی وارث کی نماز جنازہ پہلوان گوٹھ میں ادا کی گئی، نماز جنازہ میں علمائے کرام، مقتولین کے عزیز و اقارب اور اہل محلہ نے شرکت کی، نماز جنازہ کے بعد ورثاء نے احتجاج بھی کیا، مظاہرین کا مطالبہ تھا کہ واقعہ میں ملوث ملزمان کو گرفتار کیا جائے، نماز جنازہ کے موقع پر پہلوان گوٹھ میں کاروبار مکمل طور پر بند تھا اور علاقے میں پولیس اور رینجرز کی نفری تعینات تھی۔

مقتول سید مظہر عباس دو بچوں کا باپ تھا جبکہ مقتول علی وارث کی کچھ ماہ بعد شادی تھی، نماز جنازہ کے بعد مقتولین کی تدفین وادی حسین میں کردی گئی۔

گلستان جوہر پولیس نے واردات کا مقدمہ مقتول مظہر عباس کے والد محمد علی شاہ کی مدعیت میں انسداد دہشت گردی ایکٹ کے تحت درج کرلیا،ایف آئی آر میں قتل اور اقدام قتل کی دفعات شامل ہیں،واضح رہے کہ گزشتہ شب پہلوان گوٹھ میں امام بارگاہ کے قریب بیٹھے افراد پر موٹر سائیکل سوار ملزمان نے فائرنگ کردی تھی جس کے نتیجے میں 6 افراد زخمی ہوگئے تھے جبکہ علاقے میں خوف وہراس پھیل گیا تھا۔ پولیس کے مطابق عینی شاہدین نے بتایا کہ حملہ آور کار اور موٹر سائیکلوں پر سوار تھے۔