طاقتور مون سون ہوائیں سندھ میں داخل۔۔ کراچی میں گرج چمک کے ساتھ بارش کب ہوگی؟ اربن فلڈنگ کا خطرہ

محکمہ موسمیات نے خبردار کیا ہے کہ سندھ کے بیشتر اضلاع میں آج سے بارشوں کا نیا سلسلہ شروع ہونے جا رہا ہے، جس کے باعث کئی شہروں میں نظام زندگی متاثر ہو سکتا ہے۔ تازہ پیش گوئی کے مطابق مون سون کی طاقتور ہوائیں صوبے کے مختلف حصوں میں داخل ہو رہی ہیں، جو 19 اگست تک وقفے وقفے سے بارش برسائیں گی۔

رپورٹ کے مطابق جیکب آباد، شکارپور، لاڑکانہ اور قمبر شہداد کوٹ میں بارش کا سلسلہ متوقع ہے، جبکہ کشمور، نوشہرو فیروز، دادو، میرپور خاص، سانگھڑ، خیرپور، شہید بینظیر آباد، حیدرآباد، جامشورو، ٹنڈو محمد خان، ٹنڈو الہ یار، عمرکوٹ، ٹھٹہ، بدین اور تھرپارکر میں بھی گرج چمک کے ساتھ بارش ہونے کا امکان ہے۔ کہیں کہیں درمیانی سے شدید اور بعض مقامات پر موسلا دھار بارش بھی ہو سکتی ہے۔

محکمہ موسمیات نے نشاندہی کی ہے کہ گڈو اور سکھر بیراج پر نچلے درجے کا سیلاب موجود ہے، جبکہ کوٹری بیراج میں پانی کا بہاؤ معمول کے مطابق ہے۔ حکام کے مطابق تیز بارشوں کے دوران شہری علاقوں میں اربن فلڈنگ، نشیبی مقامات پر پانی جمع ہونے اور بجلی گرنے جیسے واقعات کے خدشات ہیں۔ کسانوں کو بھی ہدایت کی گئی ہے کہ اپنے زرعی امور موسم کی صورتحال کو مدنظر رکھتے ہوئے ترتیب دیں۔

کراچی کے حوالے سے محکمہ موسمیات کا کہنا ہے کہ آج مطلع جزوی ابر آلود اور موسم مرطوب رہے گا۔ شہر کے مضافاتی علاقوں میں بارش کا امکان ہے، جبکہ پیر کے روز گرج چمک کے ساتھ درمیانی بارش ہو سکتی ہے۔ منگل کو بھی کہیں درمیانی اور کہیں موسلا دھار بارش متوقع ہے، اور یہ سلسلہ 23 اگست تک جاری رہ سکتا ہے۔

ماہرین نے خبردار کیا ہے کہ کراچی میں ایک سے دو بار تیز بارش کے اسپیل آ سکتے ہیں، جس کے نتیجے میں اربن فلڈنگ کا خدشہ بڑھ جائے گا، اس لیے شہری احتیاطی تدابیر اختیار کریں۔