سکیورٹی فورسز نے یکم اکتوبر کو ضلع شیرانی میں خفیہ اطلاع پر انٹیلی جنس بیسڈ آپریشن کر کے 7 بھارتی حمایت یافتہ دہشت گردوں کو ہلاک کر دیا ہے۔
آئی ایس پی آر نے بتایا کہ مارے گئے دہشت گرد بھارتی پروکسی تنظیم فتنہ الخوارج سے تعلق رکھتے تھے اور علاقے میں متعدد تخریبی کارروائیوں میں ملوث رہے ہیں۔ آپریشن کے دوران دہشت گردوں کے قبضے سے بھاری مقدار میں اسلحہ، گولہ بارود اور بارودی مواد بھی برآمد کیا گیا۔
ذرائع کا کہنا ہے کہ آپریشن خفیہ اطلاع کی بنیاد پر کیا گیا تھا اور سکیورٹی فورسز نے دہشت گردوں کے ٹھکانوں کو مؤثر انداز میں نشانہ بنایا۔ اس دوران فورسز اور دہشت گردوں کے درمیان شدید فائرنگ کا تبادلہ ہوا جس میں یہ سات دہشت گرد مارے گئے۔
آئی ایس پی آر نے مزید کہا کہ علاقے میں کلیئرنس اور سینی ٹائزیشن آپریشن جاری ہے تاکہ ممکنہ دیگر دہشت گرد عناصر کا راستہ روکا جا سکے اور علاقے کو مکمل طور پر محفوظ بنایا جا سکے۔
پاک فوج نے ایک بار پھر اس عزم کا اعادہ کیا ہے کہ بھارتی سرپرستی میں ہونے والی دہشت گردی کو ملک سے جڑ سے ختم کیا جائے گا اور دہشت گردی کے تمام سہولت کاروں کو انصاف کے کٹہرے میں لایا جائے گا۔