قوم شہداء کی یادگاروں کی بے حرمتی کرنے والوں کو معاف نہیں کرے گی ،رانا مشہود احمد خان

اسلام آباد۔9مئی (اے پی پی):چیئرمین وزیر اعظم یوتھ پروگرام رانا مشہود احمد خان نے کہا ہے کہ آج پوری قوم پاکستان کے دشمنوں اور اُن کے ایجنٹوں کے خلاف متحد ہے اور ایک زبان ہوکر پکار رہی ہے کہ شہداء کی یادگاروں کی بے حرمتی اور ان کے وقار کو مجروح کرنے والوں کو نہ معاف کرے گی نہ ہی بھولے گی۔

جمعرات کو وزیراعظم یوتھ پروگرام سے جاری بیان کے مطابق وزیراعظم یوتھ پروگرام کے چیئرمین رانا مشہود احمد خان نے کہا کہ 9 مئی یوم سیاہ کا دِن ہے، پاکستان کے دشمنوں سے لڑنے والوں سے لڑ کر فسادی جتھے نے پاکستان کے دشمنوں کے لشکر کاحصہ ہونے کا عملی ثبوت دیا۔

انہوں نے کہا کہ آج پوری قوم پاکستان دشمنوں اور اُن کے ایجنٹوں کے خلاف متحد ہے اور ایک زبان ہوکر پکار رہی ہے کہ شہداء کی یادگاروں کی بے حرمتی اور ان کے وقار کو مجروح کرنے والوں کو نہ معاف کرے گی نہ ہی بھولے گی اور ایسے امر کو برداشت نہیں کیا جائے گا۔