شوبز میں خوبصورتی اور فٹنس ہمیشہ سے ہی توجہ کا مرکز رہی ہے لیکن حالیہ دنوں میں چند بالی وُڈ شخصیات نے حیرت انگیز طور پر قلیل مدت میں اپنا وزن کم کر کے سب کی توجہ اپنی جانب مبذول کرا لی ہے۔
’پُونے پلس‘ کے مطابق ان ستاروں نے وزن کم کرنے کے لیے نہ کوئی دوا استعمال کی ہے اور نہ ہی کسی ٹرینڈنگ ڈائیٹ کا سہارا لیا بلکہ سادہ اور مستقل معمولات زندگی اپنا کر صحت مند جسم پایا۔
آئیے آپ کو ان بالی وُڈ ستاروں کے بارے میں بتاتے ہیں جنہوں نے سادہ طریقوں سے وزن کم کر کے لاکھوں مداحوں کو متاثر کیا ہے۔
کرن جوہر
مشہور فلم ساز کرن جوہر حال ہی میں اپنے وزن میں کمی کے باعث شہ سرخیوں کا حصہ رہے ہیں۔
ایک انٹرویو میں انہوں نے بتایا کہ اُنہوں نے وزن کم کرنے کے لیے او ایم ڈی (ون میل اے ڈے، ایک وقت کا کھانا) نامی طریقہ کار اپنایا جس میں پورے دن کی کیلوریز ایک ہی کھانے میں لی جاتی ہیں۔
View this post on Instagram A post shared by Karan Johar (@karanjohar)
وزن کم کرنے کے لیے کرن جوہر نے چینی، دودھ اور گندم سے بنی اشیا اپنی خوراک سے نکال دیں۔
کرن جوہر کے مطابق ایک صحت مند جسم انہوں نے کسی دوا یا کسی دوسرے فوری طریقے کے بجائے سخت نظم و ضبط اور مستقل مزاجی سے حاصل کیا ہے۔
بھارتی سنگھ
مشہور کامیڈین بھارتی سنگھ نے بغیر کسی ورزش کے صرف 10 ماہ میں کی قلیل مدت میں 16 کلو وزن کم کر کے سب کو حیران کر دیا۔
وزن کم کرنے کے لیے انہیں کوئی زیادہ تگ و دو نہیں کرنا پڑی بلکہ اس کے حصول کے لیے انہوں نے صرف اتنا کیا کہ شام سات بجے کے بعد کھانا کھانا ترک کر دیا۔
View this post on Instagram A post shared by Bharti Siingh (@bharti.laughterqueen)
بھارتی کا وزن کم کرنے کا طریقہ وقت کی پابندی پر مبنی تھا اور اس دوران وہ جنک فوڈ کے بجائے گھر کا سادہ کھانا کھاتی رہیں۔
انہوں نے اپنی پسندیدہ اشیا کو بھی مکمل طور پر نہیں چھوڑا جس کی وجہ سے اُن کا طریقہ آسان، مؤثر اور پائیدار ثابت ہوا۔ اُن کی تبدیلی نے عام لوگوں کو بھی امید دلائی ہے کہ مشکل ڈائیٹ کے بغیر بھی صحت مند بنا جا سکتا ہے۔
ودیا بالن
اداکارہ ودیا بالن نے کئی بار اپنی جسمانی ساخت کی وجہ سے پیش آنے والے مسائل پر بات کی ہے۔ اُنہوں نے بتایا کہ اُن کا وزن بڑھنے کی بڑی وجہ جسم میں سوزش تھی جس کا علاج انہوں نے ’سوزش مخالف خوراک‘ کا انتخاب کر کے کیا۔
ودیا بالن کے مطابق ’اُن کا وزن بڑھنے کی بڑی وجہ جسم میں سوزش تھی‘ (فائل فوٹو: انسٹاگرام)
انہوں نے پانی پینے میں اضافہ، محتاط کھانے اور خود کو سمجھنے پر توجہ دی۔
46 سال کی اداکارہ کا کہنا ہے کہ ’جسمانی تبدیلی کے لیے کسی ٹرینڈی ڈائیٹ کی نہیں بلکہ شعور کی ضرورت ہے۔‘
رام کپور
ٹیلی ویژن اور سنیما کے مشہور اداکار رام کپور نے 18 ماہ میں 55 کلو وزن کم کیا ہے۔
51 سال کے رام کپور نے وزن کم کرنے کے لیے انہوں ’انٹرمیٹنٹ فاسٹنگ‘ کا طریقہ اپنایا جس میں روزانہ 16 گھنٹے کچھ نہیں کھایا جاتا۔
View this post on Instagram A post shared by Ram Kapoor (@iamramkapoor)
رام کپور نے دودھ، چینی، تیل اور زیادہ تر نشاستہ دار اشیا کو چھوڑ دیا۔ اُن کا کہنا ہے کہ یہ صرف جسمانی تبدیلی نہیں تھی بلکہ ایک ذہنی تبدیلی بھی تھی کہ زندگی اور صحت کو کس نگاہ سے دیکھنا ہے۔
کپل شرما
مشہور کامیڈین کپل شرما نے بھی حالیہ دنوں میں اپنے وزن میں 11 کلو کی کمی کر کے سب کو متاثر کیا ہے۔
انہوں نے وزن کم کرنے کے لیے ’اکیس، اکیس، اکیس‘ کا طریقہ اپنایا۔
View this post on Instagram A post shared by Kapil Sharma (@kapilsharma)
انہوں نے تلی ہوئی اشیا، شراب اور کافی کو خیرباد کہا اور گھریلو کھانوں کو ترجیح دی۔ کپل شرما کا کہنا ہے کہ ذہنی سکون اور دباؤ سے نجات نے اُن کی فٹنس میں اہم کردار ادا کیا۔
ان شوبز ستاروں کی کہانیاں ثابت کرتی ہیں کہ مستقل مزاجی، سادہ خوراک اور ذہنی سکون سے وزن کم کیا جا سکتا ہے۔