دفاتر پر تالے کا معاملہ عدالت جاتے ہی گورنر سندھ کا مؤقف سامنے آگیا

قائم مقام گورنر سندھ اویس قادر شاہ کی جانب سے گورنر ہاؤس میں دفاتر پر تالے کا معاملہ عدالت لے جانے کے بعد کامران ٹیسوری کا مؤقف بھی سامنے آگیا۔ گورنر سندھ کامران ٹیسوری نے کہا ہے کہ گورنر ہاؤس ہمیشہ عوام کےلیے کھلا ہے۔انہوں نے کہا کہ بطور اسپیکر اور ذاتی حیثیت میں اویس قادر شاہ قابل احترام ہیں۔

ترجمان گورنر کا کہنا ہے کہ قائم مقام گورنر اویس قادر شاہ کو صورتحال سے متعلق غلط فہمی ہوئی، سیکریٹری داخلہ، آئی جی، ڈی آئی جیز اور دیگر افسران اجلاس میں شرکت کےلیے کانفرنس روم میں تھے۔ ترجمان کے مطابق قائم مقام گورنر کے لیے مخصوص دفتر پیشگی طور پر تیار تھا، مرکزی دفتر استعمال کرنا مقصود تھا تو بروقت آگاہ کیا جاتا تو انتظام کر دیا جاتا۔ ان کا مزید کہنا تھا کہ گورنر سندھ کی پرنسپل سیکریٹری کو 24 گھنٹوں میں واقعے کی انکوائری مکمل کرنے کی ہدایت کردی گئی ہے۔