تیکساس :ٹیکنالوجی کے معروف رہنما اور اسپیس ایکس، ٹیسلا اور ایکس (ٹوئٹر) کے بانی ایلون مسک نے بچوں کے لیے مصنوعی ذہانت پر مبنی ایک نیا چیٹ بوٹ ’بے بی گروک‘ لانچ کرنے کا اعلان کیا ہے۔ یہ چیٹ بوٹ خاص طور پر بچوں کے لیے ایک محفوظ اور تعلیمی ماحول فراہم کرنے پر مرکوز ہوگا۔
ایلون مسک نے ایک ایکس پوسٹ میں بتایا کہ ’بے بی گروک‘ گروک چیٹ بوٹ کا آسان ورژن ہوگا جس کا مقصد کم عمر صارفین کو ایک محفوظ اور دوستانہ تجربہ دینا ہے۔ تاہم، انہوں نے اس نئی ایپ کے بارے میں مزید تفصیلات ابھی فراہم نہیں کیں۔
یاد رہے کہ ان کی کمپنی ایکس اے آئی نے 2023 میں گروک چیٹ بوٹ متعارف کروایا تھا، جو اوپن اے آئی کے چیٹ جی پی ٹی اور گوگل جیمنائی جیسے ماڈلز کے مقابلے میں پیش کیا گیا تھا۔ بعد میں اسے ایکس پلیٹ فارم کا حصہ بنا دیا گیا اور اس ٹیکنالوجی کو بہتر بنانے کے لیے بھاری سرمایہ کاری کی گئی۔
جولائی 2025 میں گروک 4 ماڈل متعارف کرایا گیا، جس کے بارے میں ایلون مسک کا کہنا ہے کہ یہ دیگر اے آئی ماڈلز کے مقابلے میں ہر موضوع پر بہتر کارکردگی دکھاتا ہے۔