ملائیشیا کی ریاست ترنکگانو نے بغیر کسی شرعی عذر کے نماز جمعہ ترک کرنے والے مردوں کے لیے سخت سزاؤں کا اعلان کردیا۔
اعلان میں کہا گیا ہے کہ نماز جمعہ چھوڑنے پر ایسے شخص کو سزا کے طور پر 2 سال قید اور 3 ہزار رنگٹ کا بھاری جرمانہ یا دونوں میں سے کوئی بھی ایک سزا سنائی جائے گی۔
یہ اعلان ملائیشین اسلامی پارٹی (پی ایس اے) کے زیر انتظام ریاست ترنکگانو میں رواں ہفتے کیا گیا۔ اس سے قبل قانون کے مطابق تین بار نماز جمعہ ترک کرنے پر کارروائی عمل میں لائی جاتی تھی تاہم نئے ضوابط کے بعد ایک بار نماز چھوڑنا بھی قابل سزا جرم قرار دیا گیا ہے۔
ریاستی حکام کا کہنا ہے کہ جمعہ کی نماز نہ پڑھنے والے مردوں کے خلاف کارروائی عوامی رپورٹس یا گشتوں کے ذریعے عمل میں لائی جائے گی۔
اس موقع پر ریاستی ایگزیکٹو کونسل کے رکن محمد خلیل عبدالہادی نے کہا کہ سزا سے پہلے یاد دہانی کروانا ضروری ہے کیونکہ جمعہ کی نماز نہ صرف ایک مذہبی فریضہ بلکہ مسلمانوں کے درمیان اتحاد اور فرمانبرداری کی علامت ہے۔ ان کے مطابق سزا صرف ان افراد کو دی جائے گی جو یاد دہانی کے باوجود نماز جمعہ ترک کریں گے۔