پاکستان اسٹاک ایکسچینج میں ایک روزہ مندی کے بعد جمعہ کو ایک بار پھر تیزی دیکھی گئی اور کے ایس ای 100 انڈیکس 1 لاکھ 50 ہزار پوائنٹس کی نفسیاتی حد بحال کرنے میں کامیاب ہوگیا۔
مارکیٹ میں پہلے ٹریڈنگ سیشن کے دوران 1100 پوائنٹس سے زائد کا اضافہ ریکارڈ کیا گیا جبکہ سرمایہ کاروں کی دلچسپی سیمنٹ، بینکنگ، تیل و گیس سمیت منافع بخش شعبوں میں نمایاں رہی۔
یاد رہے کہ رواں ہفتے پیر سے بدھ تک اسٹاک مارکیٹ میں ریکارڈ توڑ تیزی کا سلسلہ جاری رہا تھا تاہم جمعرات کو مندی دیکھنے میں آئی اور انڈیکس 1355 پوائنٹس گر گیا تھا۔
اسٹاک ماہرین کے مطابق معاشی اعشاریے مستحکم ہونے کے باعث سرمایہ کار دوبارہ حصص خریداری کی طرف مائل ہیں تاہم بلند ترین سطح پر ٹریڈ ہونے کے باعث سرمایہ کار محتاط بھی دکھائی دے رہے ہیں۔ ماہرین کا کہنا ہے کہ ایک لاکھ 50 ہزار پوائنٹس کی سطح سرمایہ کاروں کے لیے نفسیاتی اہمیت رکھتی ہے جبکہ بدھ کو 1 لاکھ 51 ہزار پوائنٹس کی سطح عبور کرنے کے بعد مارکیٹ میں تذبذب کی کیفیت بھی پیدا ہوگئی تھی۔