حکومت خیبر پختونخوا نے قبائلی اضلاع کے تیز رفتار ترقیاتی پروگرام کے لیے ذیلی کمیٹی قائم کر دی۔ کمیٹی میں وزیر اعظم کے معاون خصوصی و وزیر مملکت برائے قبائلی علاقہ جات مبارک زیب، ایڈیشنل چیف سیکرٹری ترقی و منصوبہ بندی، سیکرٹری خزانہ، وزارتِ منصوبہ بندی اور ہیڈ کوارٹر 11 کور پشاور کے نمائندے شامل ہیں۔
محکمہ ترقی و منصوبہ بندی کی جانب سے جاری اعلامیہ کے مطابق کمیٹی مالی سال 26-2025 کے ترقیاتی منصوبوں کا جائزہ لے گی اور عوامی مفاد میں تیزی سے سہولیات فراہم کرنے والے منصوبوں کی نشاندہی کرے گی۔
اعلامیہ میں کہا گیا کہ کمیٹی جاری منصوبوں پر خصوصی توجہ دے گی اور تیز رفتار ترقیاتی پروگرام کو آگے بڑھانے کے ساتھ اور زیادہ مؤثر پراجیکٹس کی ترجیحی بنیادوں پر جلد تکمیل کو یقینی بنایا جائے گا۔
واضح رہے کہ اس ذیلی کمیٹی کی تشکیل 22 اگست کو ہونے والی پہلی جوائنٹ اسٹیئرنگ کمیٹی کی سفارش پر کی گئی تھی جبکہ کمیٹی اپنی رپورٹ آئندہ جوائنٹ اسٹیئرنگ کمیٹی اجلاس میں پیش کرے گی۔