اسلام آباد: فیڈرل انویسٹی گیشن ایجنسی (ایف آئی اے) امیگریشن ونگ نے اسلام آباد انٹرنیشنل ایئرپورٹ پر بروقت کارروائی کرتے ہوئے انسانی اسمگلنگ کی کوشش ناکام بنا دی۔
ترجمان ایف آئی اے کے مطابق ایک خاتون بیرونِ ملک سفر کے دوران بچوں کو اپنی اولاد ظاہر کرکے غیر قانونی طور پر لے جانے کی کوشش کر رہی تھی۔ امیگریشن حکام نے شک گزرنے پر خاتون کو آف لوڈ کیا اور ابتدائی تفتیش کے بعد حقیقت سامنے آنے پر اسے گرفتار کر لیا۔
حکام کا کہنا ہے کہ خاتون کو قانونی تقاضے پورے کرنے کے بعد اینٹی ہیومن اسمگلنگ سیل منتقل کیا جائے گا، جہاں اس سے مزید تفتیش کی جائے گی۔ ایف آئی اے نے واضح کیا ہے کہ انسانی اسمگلنگ کے خلاف زیرو ٹالرنس پالیسی پر سختی سے عمل درآمد کیا جا رہا ہے اور اس جرم میں ملوث عناصر کے خلاف سخت قانونی کارروائی کی جائے گی۔
ذرائع کے مطابق بچوں کے حقیقی والدین اور واقعے کے پس منظر کی بھی جانچ پڑتال کی جا رہی ہے تاکہ پورے نیٹ ورک کو بے نقاب کیا جا سکے۔