امریکی محکمہ خارجہ نے پاکستان کے صوبہ بلوچستان میں سرگرم عسکریت پسند گروہ بلوچ لبریشن آرمی اور اس کی ذیلی تنظیم ’مجید بریگیڈ‘ کو غیرملکی دہشت گرد تنظیم قرار دے دیا ہے۔امریکی محکمہ خارجہ کی جانب سے پیر کو جاری کردہ بیان کے مطابق محکمہ خارجہ نے مجید بریگیڈ کو بی ایل اے کے پہلے سے موجود ’خصوصی طور پر نامزد عالمی دہشت گرد‘ Specially Designated Global Terrorist کے درجے میں بطور ضمنی نام شامل کیا ہے۔بیان میں کہا گیا ہے کہ کہ بی ایل اے کو سنہ 2019 میں کئی دہشت گرد حملوں کے بعد ’خصوصی طور پر نامزد عالمی دہشت گرد‘ قرار دیا گیا تھا۔
سنہ 2019 کے بعد بی ایل اے نے مزید حملوں کی ذمہ داری قبول کی ہے، جن میں مجید بریگیڈ کے ذریعے کیے گئے حملے بھی شامل ہیں۔
سنہ 2024 میں بی ایل اے نے کراچی ایئرپورٹ کے قریب اور گوادر پورٹ اتھارٹی کمپلیکس پر خودکش حملوں کی ذمہ داری قبول کی۔محکمہ خارجہ کے اعلامیے میں مزید کہا گیا ہے کہ سنہ 2025 مارچ میں بی ایل اے نے کوئٹہ سے پشاور جانے والی جعفر ایکسپریس ٹرین کے اغوا کی ذمہ داری قبول کی، جس میں 31 عام شہری اور سکیورٹی اہلکار جان سے گئے اور 300 سے زائد مسافروں کو یرغمال بنایا گیا۔اعلامیے میں کہا گیا ہے کہ محکمہ خارجہ کی آج کی کارروائی ٹرمپ انتظامیہ کی دہشت گردی کے خلاف عزم کی عکاسی کرتی ہے۔ ’دہشت گرد تنظیموں کو نامزد کرنا ہماری اس جدوجہد میں ایک اہم قدم ہے، اور یہ دہشت گردانہ سرگرمیوں کے لیے امداد کو روکنے کا مؤثر ذریعہ ہے۔‘محکمہ خارجہ کے مطابق یہ اقدامات امیگریشن اور نیشنلٹی ایکٹ کی دفعہ 219 (ترمیم شدہ) اور ایگزیکٹو آرڈر 13224 (ترمیم شدہ) کے تحت کیے گئے ہیں۔ غیرملکی دہشت گرد تنظیموں کی نامزدگیاں فیڈرل رجسٹر میں اشاعت کے بعد نافذ العمل ہوتی ہیں۔