بیرون ملک مقیم پاکستانیوں کی جانب سےرواں مالی سال کے پہلے ماہ جولائی کے دوران 3.2 ارب ڈالر کی رقوم وطن بھجوائی گئیں جو اس سے پچھلے سال جون کے 3.4 ارب ڈالر کے مقابلے میں کم لیکن جولائی 2024 کے مقابلے میں 7.4 فیصد زیادہ ہے۔
دنیا کے مختلف ممالک میں مقیم پاکستانیوں نے اپنی کمائی وطن بھجوائی، حسب روایت سعودی عرب میں مقیم پاکستانی جولائی میں بھی پہلے نمبر پر رہے۔
اسٹیٹ بینک کے اعداد و شمار کے مطابق جولائی میں سعودی عرب سے 82 کروڑ 37 لاکھ ڈالر رقوم موصول ہوئی، دوسرے نمبر پر متحدہ عرب امارات سے 66 کروڑ 52 لاکھ ڈالر کے ترسیلات زر موصول ہوئے۔ برطانیہ کے پاکستانی تیسرے نمبر پر رہے جنہوں نے ایک ماہ میں 45 کروڑ ڈالر بھجوائے۔
بحرین، کویت، قطر اور عمان سمیت خلیجی ممالک سے 29 کروڑ 60 لاکھ ڈالر جب کہ یورپی ممالک سے 42 کروڑ 44 لاکھ ڈالر موصول ہوئے۔ امریکا سے پاکستانیوں نے جولائی میں 26 کروڑ 96 لاکھ ڈالر وطن بھجوائے۔
کن ممالک سے موصول رقوم میں کمی ہوئی؟
جون کے مقابلے میں جولائی کے دوران ابوظہبی، شارجہ، بحرین، کویت، اٹلی، سوئٹزرلینڈ سے ترسیلات زر میں اضافہ ہوا باقی ممالک سے ترسیلات زر میں کمی ریکارڈ کی گئی۔