خیبر پختونخوا حکومت نے یومِ آزادی اور معرکۂ حق میں کامیابی کو بھرپور طریقے سے منانے کے لیے 7 سے 14 اگست تک جشنِ آزادی ہفتہ منانے کا اعلان کر دیا ہے۔ اس سلسلے میں 19 سرکاری محکموں کو مخصوص ذمہ داریاں تفویض کی گئی ہیں، جب کہ صوبائی انتظامیہ نے تمام ضلعی انتظامیہ اور محکموں کو باقاعدہ مراسلہ بھی جاری کر دیا ہے۔
14 اگست کی صبح 8 بجے صوبے بھر میں سائرن بجائے جائیں گے اور تمام ٹریفک عارضی طور پر روک دی جائے گی۔ یہ ذمہ داری تمام ڈویژنل کمشنرز اور ڈپٹی کمشنرز پر عائد کی گئی ہے۔
گورنر ہاؤس، وزیراعلیٰ ہاؤس، سول سیکریٹریٹ پشاور اور تمام ضلعی ہیڈکوارٹرز پر پرچم کشائی کی تقریبات منعقد ہوں گی۔
13 اگست کو آپریشن بنیان المرصوص کے شہداء کو خراج عقیدت پیش کرنے کے لیے خصوصی پیغامات، تقاریر اور ویڈیوز سرکاری ویب سائٹس پر جاری کی جائیں گی۔
تمام افسران و ملازمین کو پاکستانی پرچم سینے پر لگانے اور سرکاری گاڑیوں کو قومی پرچموں سے سجانے کی ہدایت کی گئی ہے۔
7 اور 14 اگست کو سرکاری عمارتوں، مشہور چوکوں، اور سیاحتی مقامات پر بینرز اور چراغاں کیا جائے گا۔ بہترین سجاوٹ کرنے والے محکمے کو انعام دیا جائے گا۔12 اور 14 اگست کو تمام اضلاع، یونیورسٹیوں اور کالجوں کی بڑی مساجد میں خصوصی دعاؤں کا اہتمام کیا جائے گا۔
13 اور 14 اگست کو ریڈیو، ٹی وی اور سوشل میڈیا پر معروف شخصیات کی تقاریر، کوئز مقابلے اور بحث و مباحثے نشر کیے جائیں گے۔یومِ آزادی ایوارڈز کے تحت تعلیم، صحت اور سماجی بہبود کے شعبوں میں خدمات انجام دینے والوں کو خراجِ تحسین پیش کیا جائے گا۔
12 سے 14 اگست تک صوبے بھر میں کرکٹ، فٹبال، والی بال، اور ہاکی کے مقابلے منعقد کیے جائیں گے، جن میں قومی کھلاڑی بھی شریک ہوں گے۔ پشاور میں میگا اسپورٹس ایونٹ کا انعقاد کیا جائے گا۔
7 سے 14 اگست تک لوکل گورنمنٹ ڈیپارٹمنٹ کی جانب سے صاف ستھری خیبر پختونخوا مہم چلائی جائے گی، جس میں سیاحتی مقامات پر خصوصی توجہ دی جائے گی۔
صوبائی حکومت نے اس موقع پر تمام محکموں، ضلعی انتظامیہ اور عوام سے بھرپور تعاون کی اپیل کی ہے تاکہ یومِ آزادی کی تقریبات پُرامن، منظم اور یادگار بنائی جا سکیں۔