احتجاج ٹی ایل پی کا حق ہے، حکومت تشدد بند کرے: فضل الرحمان

اردو نیوز  |  Oct 27, 2021

جمعیت علمائے اسلام  اور اپوزیشن اتحاد پی ڈی ایم کے سربراہ مولانا فضل الرحمان نے کہا ہے کہ ’احتجاج تحریک لبیک کا جمہوری حق ہے، حکومت اس کے کارکنوں پر تشدد بند کرے۔‘

بدھ کو اسلام آباد میں صحافیوں سے گفتگو کرتے ہوئے مولانا فضل الرحمان کا مزید کہنا تھا کہ ’ٹی ایل پی کے مطالبات غلط یا درست ہونے سے قطع نظر، حکومت معاملے کو قانون کے دائرے میں رہتے ہوئے شائستگی سے حل کرے۔‘

انہوں نے حیرت کا اظہار کرتے ہوئے کہا کہ ’عجیب بات ہے کہ جب تحریک لبیک والے نواز شریف کے خلاف احتجاج کر رہے تھے تو وہ درست تھا اور عمران خان کے خلاف غلط ہے۔‘

انہوں نے پی ٹی آئی کے دھرنے کا حوالہ دیتے ہوئے کہا کہ ’126 روز تک احتجاج کرنے والوں کو احتجاج برا کیوں لگ رہا ہے۔‘

بلدیاتی انتخابات کے حوالے سے پوچھے گئے سوال پر ان کا کہنا تھا کہ ’جس حکومت کو نہیں مانتے اس کی نگرانی میں ہونے والے بلدیاتی انتخابات کو بھی تسلیم نہیں کرتے۔‘

ان کے مطابق ’ہمارا مطالبہ عام انتخابات کا انعقاد ہے، پہلے وہ کروائے جائیں اور بلدیاتی انتخابات منسوخ کیے جائیں۔‘

ان کا یہ بھی کہنا تھا کہ ’مشاورت کر رہے ہیں کہ الیکشن کمیشن سے رجوع کیا جائے۔‘

اس کے باوجود بھی بلدیاتی انتخابات کے انعقاد کے حوالے سے پوچھے گئے سوال پر انہوں نے کہا کہ ’اگر مسلط کرنے کی کوشش کی گئی تو ہمارے لیے قابول نہیں ہو گا۔‘

ان کے بقول ’اگر کوئی راستہ نہ بچا تو بائیکاٹ کر دیں گے۔‘

مزید خبریں

Disclaimer: Urduwire.com is only the source of Urdu Meta News (type of Google News) and display news on “as it is” based from leading Urdu news web based sources. If you are a general user or webmaster, and want to know how it works? Read More